«Rýhanı jańǵyrý» baǵdarlamasy aıasynda «Kitaphana – qoǵamnyń kópfýnksııanaldy, kópdeńgeıli áleýmettik ınstıtýty» taqyrybynda Búkilqazaqstandyq kitaphanashylar sezi bastaldy.
Qyrkúıek aıynyń 13-14 kúnderine josparlanǵan mańyzdy mádenı sharaǵa elimiz óńirlerinen eki júzge tarta kitaphana salasynyń mamandary keldi. Uıymdastyrýshylardyń aıtýynsha, kitaphanashylar sezi respýblıkadaǵy kitaphana salasynyń bolashaqtaǵy saıasatyn aıqyndaıtyn, jańǵyrtatyn jáne jańasha serpin beretin mańyzdy mádenı oqıǵa bolyp tabylady.
Qazaqstan kitaphanashylary 1998 jyldan keıin 20 jyl óte barlyq júıeler men vedomstvolardyń kitaphanalyq qaýymdastyǵynyń alǵash ret basyn qosyp otyr. Sezge otandyq kitaphana salasy ókilderimen qatar AQSh, Túrkııa, Reseı, Belarýs, О́zbekstan, Tájikstan, Qyrǵyzstan jáne t.b. memleketter kitaphanalarynyń mamandary qatysýda.
«Sazgen sazy» folklorlyq-etnografııalyq ansambliniń súıemeldeýimen bastalǵan mádenı shara kitap kórmesi aıasynda jalǵasty. Sezdiń resmı bólimi Qazaqstan Respýblıkasy Parlament Senaty Áleýmettik-mádenı damý jáne ǵylym komıtetiniń tóraıymy Birǵanym Áıtimova, aqyn Oljas Súleımenov, ǵalym Ábsattar Derbisáli, Qazaqstan Jazýshylar odaǵynyń tóraǵasy Ulyqbek Esdáýlet, Reseı memlekettik kitaphanasynyń dırektory V.V.Dýda Ulttyq kitaphana dırektory Janat Seıdýmanov, IýNESKO ókilderi, t.b. sóz sóılep, kitaphananyń qoǵamdaǵy róline qatysty mańyzdy máselelerdli ortaǵa saldy.
Elvıra SERIKQYZY,
«Egemen Qazaqstan»
ALMATY